أنا ماليش أوي في السياسة بصراحة .. ولا صراع الحكومات والأفراد المنشود لأني في معظم الأوقات بقول البلد هي المجتمع و المجتمع أفراد و مافيش أي عذر لأي فرد يخليه يبقى معندوش ضمير .. الفقر مش عذر و الحكومة مش عذر و بالمناسبة .. المسئولين دول مصريين و يمكن في يوم كانو بينقضوا الحكومة برده ، الفكرة اني ساعات افتح مواقع اخبار اتفرج اشوف ايه الجديد .. يعني اهو الواحد برده مايبقاش عايش لوحده زي القلة المحطوطة على شباك المشربية مش فاهمة حاجة ، مصراوي على المصري اليوم .. لأني من أيام ما كنت ف مصر و انا بقترح عليهم يغيروا مسمي جريدة الأهرام إلى اضحك كركر لأن الأخبار اللي فيها كانت بتضحكني أوي فاكر من كام شهر كده كان مكتوب انه هيئة الاقتصاد الدولية تشيد بالاقتصاد المصري .. انا بحب مصر و طبعا اتمنى انه الخواجات يقولو كلام كويس ف حقنا بس محبش حد يحسسني اني اهبل ، يعني الواقع حلو حتى لو مؤلم النهاردة بعد ما قريت الكوارث الكتير ، لفت نظري الخبر ده :
للي ما بيحبش يوجع راسه ويقرا الخبر ، ببساطة الناس في الجيزة مقدمه شكوى جماعية عشان المحافظ قدم ميعاد الامتحانات بتاعة نصف العام للسنين اللي التعليم المصري فاكرها مالهاش لزمة زي اولى ابتدائي و اولى ثانوي و الحاجات الهايلة دي ، طبعا كرمشت وشي و عملت حواجبي سبعة مقلوبة و قلت ده تهريج .. ازاي المحافظ يغير المواعيد كده بمزاجه و بعدين فتحت اقرا الخبر بقه ماهو ده كان العنوان ، عارفين الناس معترضة على الموضوع ده بحجة انهم مش هايلحقوا يخلصوا المناهج عشان كام يوم ؟
اتنين
بالظبط يومين ، الامتحان كان 1/1 المحافظ خلاه 30/12 و الناس مضايقة و المدرسين بيقولو احنا كده اتزنقنا و العيال هتسقط و الرجالة تجري و الستات تصووووووت ... هو أنا فاهم صح ؟ ولا الجورنال حب يكتب خبر فكاهي ؟ ولا ايه بالظبط .. حد يفهمني يا جدعان .. الحكومة وحشة قلنا ماشي ، بس الناس جرالها ايه ؟
