معرفش ايه اللي خلاني افكر في الموضوع ده الحقيقة بس افتكرت اصلي واحد من اصحابي لما كنت ف مصر كان دايما يحسسني انه من الطبقة الارستقراطية و بالرغم ان الالقاب اتلغت من مصر من زمان الا اني و انا قاعد بتكلم معاه كنت بحس اني قاعد بتكلم مع حفيد الملك فاروق سنة خمسة و أربعين ، الحقيقة هو قلبه من جوه طيب اوي و ابن حلال مصفي زي زيت اولين زيت الستات الواعيين بس كان يكلمني عن المستويات و عن انه بيفكر يسكن في مكان راقي عشان البيئة المحيطة بأولاده ما تبقاش ناس فقرا – ياااي – و يكون ليهم اصحاب من نفس المستوى الاجتماعي الراقي اللي مالوش مثيل و انا مش بحب احرج حد الحقيقة فكنت ابتسم و اقعد اضحك او اقوله كلمتين كده احاول افهمه انه ميتعوجش عليا :) و كنت استغرب اوي من انه الواحد يفكر انه اعلى من الناس او انه لازم يكون اعلى و انه الحاجة بتستمد قيمتها من تمنها و ده عكس اللي علموهولنا في الموكوسة المدرسة و احنا صغيرين ، المهم يا مؤمن بقه امبارح كنت ف مكان كده و سعيد في قمة السعادة و قامت واحدة قالتلك كلمتين زي الجون اللي جابه الواد بتاع البرازيل في اخر ماتش كورة شفته مش فاكر من كام سنة كده ، قالتلك انه الواحد مننا دايما لما بيكون حاسس انه قليل او مرفوض او اي حاجة من دي يقوم يتمحك ف حاجة عشان يبان قدام الناس كويس .. قالت كده بالظبط يتمحك ف فلوسه او ف عيلته او ف انه لعيب كورة كويس ... و ينسى باقي البشر اللي اتولدو ف نفس عدد الشهور .. المهم دى اليوم امبارح و النهاردة الصبح قلت اخد دش و ده بقى وقت الجلال و الوحي كله في التفكير و المية السخنة نازلة فوق دماغك و انت نفسك تغمض عينك و تنام اصلا ، قلت هو احنا لو جمعنا الناس و قلنالهم احنا هنكرم فلان الزبال بإن كل واحد فينا هيسلم عليه النهاردة .. كام واحد هيعمل كده ؟ الناس هتقولك اصله بيمسك الزبالة ب ايده تقولش الزبالة دي جاية من مصنع الزبالة القومي ماهي جاية من عندي و عندك و عنده .. و بعدين ماحنا بنسلم على دكاترة القلب بعد ما بيفعصوا ف الناس من جواهم و ايدهم تتملي دم ... قصره بس حبيت اسأل نفسي سؤال .. و انتو كمان .. هو احنا بنحكم على الناس من خلال ايه ؟ شغلهم و لا فلوسهم و لا منصبهم ولا ايه بالظبط ؟ احترامنا للناس ايه منبعه ؟ وعلى رأي الشاعر نقلا عن عادل امام ، اللهم السبت و الحد و الاتنين ... و التلات و الاربع و الخميس .. و الجمعة اجازة .. و سامو عليكو
بندق
2 comments:
حقيقية جدا
واالى احنا مش واخدين بالنا منه هو إن الناس فعليا بتشوفنا زى ما إحنا شايفين نفسنا
"فكنا في أعيننا كالجراد وهكذا كنا في أعينهم" (عد13: 33)
الشخص اللى بيحترم كل الآخرين مهما كانوا هو شخص فى الأحساس متصالح مع نفسه و قادر يحبها كما هى لأن الله أحبه
عشان كدة بيقدر يخرج خارج نطاق نفسه ليحتوى الآخرين
لكن اللى مش عارف يقبل نفسه هيقبل التانيين بعبلهم إزاىىىى؟
بالظبط كده كلامك رائع جدا لازم كل واحد يحترم نفسه في الاأول و ده هيجبر اللي حواليه يحترموه
تحياتي و أشكر مرورك
Post a Comment