كتبت كلمتين كنت اقصد بيهم الهوية و الحكم على الناس و ازاي بنفكر في الموضوع ده بس حسيت انه مش واضح فقلت أكلمكو عن "غلطان" .. هو واحد اعرفه كويس أوي .. ساعات أحس اني أعرفه أكتر من نفسي .. دا انا حتى ساعات احس انه هو نفسي .. في الكام مشهد اللي جايين ، أحب اعرفكو عليه
(المشهد الأول : (غلطان واقف على خشبة المسرح المظلم و متسلط عليه دايرة نور
غلطان (وهو مكسوف و متلعثم) : يا رب أنا .. أنا ... أنا غلطان .... ربنا : معلش يا غلطان المهم انك عارف انك غلطان .... غلطان : بس دانا عملت حاجات كتير .. و حاجات غلط أوي .... ربنا : معلش أنا مقدر انك يمكن كنت في الوقت ده ضعيف .... يعني يارب حضرتك مسامحني كده علطول من غير حتى متأسف كتير ؟
أه خلاص اصله انا بحبك اوي يا غلطان ، وأنت غلطان بحبك و لما بتكون مش غلطان بحبك ... متشكر أوي يارب أنا لازم اروح أقول للناس كلها أنك بتحبني .. انك سامحتني .. و يجري غلطان ناحية الكواليس .
--ستارة—
المشهد التاني : تتفتح الستارة على مكان منور واسع و فيه واقف غلطان و غلطان 2 و غلطان 3 و غلطانة
غلطان ( يجري ناحية غلطان 2 ) : يا صاحبي يا صاحبي .. انا مبسوط أوي ....
غلطان2 (وهو مستغرب أو الاحسن مستنكر) : مبسوط ؟ ...
أه مبسوط جدا ( ويقرب منه خطوة ...) يرد 2 و هو بيبعد خطوتين : و كمان جدا ؟؟ انت ناسي انت عملت ايه و لا ايه ؟ انت ناسي انك .. انك غلطان ولا ايه ؟ ..
(يرد و الابتسامة تخف شوية من على وشه : اه فاكر .. ( و تنور لمبة فوق دماغة و يضحك تاني و يجري ناحية غلطان 3 و يقوله : بس انا مبسوط لأن خلاص ربنا سامحني ....
يبص له باستغراب غلطان 3 : تاني بتقول انك مبسوط ؟ ... يجري غلطان على غلطانة و هو مش عارف يضحك و لا يكشر : اه مبسوط ما هو سامحني .. خلاص هو قالي انه سامحني و بيحبني و قابلني ...
يلف حواليه غلطان2 و غلطان3 و غلطانة و يقولوله : ايه ؟ سامحك ؟ يعني ايه سامحك ؟ ازاي سامحك ؟ دا انت غلطان ؟؟ فاهم ؟غلطاان . يقع غلطان على الارض و يبص له باقي الغلطانين بقرف و يسيبو المسرح و الانوار تضلم .
--ستارة –
المشهد التالت : ( صوت جهوري لكن حنين ينده على غلطان المرمي على الارض لوحده و عليه بقعة نور
الصوت : يا غلطان ... – محدش يرد ... – يا غلطان ... – يبدأ غلطان يفوق و يقول مين ؟؟ ... – انا مش قلتلك اني سامحتك ؟ مش قلتلك اني بحبك ؟ ... – اه بس هما قالولي انه مينفعش .. انا غلطان ... – و تسمع كلامهم ليه ؟ قوم قوم نضف هدومك ... – يعني ينفع ؟ ... – يا حبيبي مانا قلتلك خلاص سامحتك .. سيبك من كل حاجة و تعالي (خليك معايا انا ... .( يتحرك غلطان بره بقعة النور و يمشي ناحية الظلام لحد ما يختفي
-ستارة النهاية –
تنزل عبارة على ستارة المسرح جاية من بروجكتور في اخر المسرح مكتوب عليها : " قد لا نستطيع .. أو بالأحرى لا نحب أن نوافق على الغفران بالرغم من أنه ليس في سلطتنا .. فلا يقدر مسجون أن يحكم على مسجون مثله بل بالحري " قاضي نزيه يفعل هكذا
بندق
0 comments:
Post a Comment