خدني ميشو عشان نتغدى في راحة الغدا ،أصل مكان شغله مش بعيد عن مكان شغلي ، و في النص بينهم تقريبا في مطعم لبناني اسمه "الروشة" بفتح الراء و سكون الواو و فتح الشين ، و قبل ما حد يسألني معرفش يعني ايه بس أهو بيبيع سندوتشات صيامي ، بأخد أنا بطاطس معظم الوقت و فلافل لما يكون في – أصلها عملة نادرة هنا أوي – أما ميشو فبيحب القرنبيط المحمر أوي ، تدخل للراجل بكل ثقة تقوله عاوز سندوتش زهرة ، يمكن عشان القرنبيط شبه الزهرة ؟ يمكن!
مش عارف ليه النهاردة افتكرت محل في بلدي اسمه البغل و يمكن اسمه مضحك أو غريب ، بس كان بيعمل فول و طعمية و قريب من البيت و الكنيسة ، فكنا دايما نعدي عليه و احنا مروحين .. جه في بالي النهاردة ذكريات كتيرة أوي متعلقة بحيوان واحد .. أقصد حاجة واحدة .. "البغل" إليكم بعضها :
لما أكون راجع البيت و يكلموني يقولولي أجيب سندوتشات للغدا أو العشا في البيت مكنتش بتتكرر كتير يمكن في أواخر الصيامات مثلا و ماما تقولنا انا و بابا و اختي بالذمة مش اللي أنا بعملهم أحسن ؟ و طبعا كنا لازم نوافق و بصراحة كان بيبقى عندها حق
لما أكون مروح مع المهندس بطرس و ماجد و حد يقترح الفكرة أننا نعدي فنقوم قاعدين كلنا في الجنينة اللي في نص الشارع و ناكل و نتكلم و اقعد أكل و أنا مستمتع بالسندوتشات و الحديث بتاعهم و خبراتهم الشيقة الكتيرة أوي
لما كان يعدي عليا بولا هاني و أنا مكتئب و مربي دقني و يقوللي انزل يلا أقوله لأ و بعدين في الأخر انزل و رجلينا تاخدنا لهناك و اقعد اتخانق معاه مين اللي يدفع و كان دايما يطلب فول بس عشان مبيحبش الطعمية
لما كنا نخرج كلنا يوم الجمعة بعد ما نروح العيال الصغيرين و نتقابل عشان نتغدى هناك بيتر و روبرت و جورج وهيب و جورج فهيم و مينا ماهر و مارك و بيترسامي و جوزيف و أندرو و ميشو بهيج و مينا نشأت و ناس تانية كمان ، و كنا بنفرح لما بييجي رمضان عشان البغل بيقفل طول الشهر فكنا بنكمل العادة في بيت أي واحد من الشلة نتغدى عنده كلنا و احنا ميتين على نفسنا من الكسوف و الضحك ، و انضم لينا ماجد الحبّوب
لما كنا نخرج بالليل كلنا نقف عند الباشا (بقالة جنب البغل) و نبعت واحد ضحية يجيب السندوتشات المخصوص و نقعد نتكلم و نضحك و نروح البيت الساعة 2 باليل ولا حاجة كلنا مبسوطين أوي و كان يكون معانا ماركو و مايكلو ميشو عماد و فرهدة و مينا بشرى و نادر محفوظ و بيتر ممدوح و ساعات جون فؤاد و ناس كتيرة أوي كلهم بحبهم أوي و واحشيني أوي
لما كنت أروح مع المهندس بطرس و يكون معانا دكتور باسم صلاح أو دكتور باسم بشرى أو مهندس أكمل و كنت بستمتع بوجودي معاهم أوي و هما كلهم كبار و أنا لسه حتت عيل
لما كنت أروح مع جون و فادي حليم و ماجد و بعدها ناكل ايس كريم من الفيومي و يقعدوا يتكلمو عن الافكار الجديدة اللي ممكن تتنفذ و تتعمل عشان الولاد الصغيرة تفرح أكتر
لما كنا دايما في الطريق للبغل نتكلم على السندوتشات بتاعته و اد ايه هي مش نضيفة و ازاي بيعملها و ازاي بتجيب أمراض و فاكرين فلان لما أكل و جاله مش عارف ايه و لما كنا نحاول نقنع بيتر سامي انه الفلوس الزيادة الي بنديها للراجل عشان يتوصي دي مش رشوة و في الأخر نكمل كلامنا و كل واحد ف ايده سندوتش من البغل
**********وحشتوني جداً ********
بندق
0 comments:
Post a Comment